'Kalaa Badana' (Odia Devotional Song) :
By : Poet Narayan Bharasa Meher
======
* कळाबदन *
ओड़िआ भक्तिगीत : राग - रसकुल्या *
('क' रु 'क्ष' पर्यन्त आद्यबर्ण्ण चउतिशा शैळीरे)
रचयिता : कवि नारायण भरसा मेहेर
= = = = =
* କଳାବଦନ *
ରାଗ - ରସକୁଲ୍ୟା
('କ'ରୁ 'କ୍ଷ' ଆଦ୍ୟବର୍ଣ୍ଣ ଚଉତିଶା ଶୈଳୀରେ)
ରଚୟିତା : କବି ନାରାୟଣ ଭରସା ମେହେର
-----------
କଳାବଦନ ହେ କଞ୍ଜ-ନୟନ !
ଖଣ୍ଡ ମୋର ଖେଦ ଖଗବାହନ ।
ଗୋବିନ୍ଦ ଗୋପାଳ ଗଳାର ମାଳୀ,
ଘନଶ୍ୟାମ ବାରେ ଘେନ ମୋ ଅଳି ହେ ।
ଓଁଙ୍କାରରୂପୀ ଅଚ୍ୟୁତ ହେ,
ଚକାଡୋଳା ଚତୁ- ର୍ଭୁଜ ଚିନ୍ତାମଣି
ଚିଦାନନ୍ଦ ଚକ୍ରହସ୍ତ ହେ ।। (୧)
ଛଇଳ ନାଗର ଛବି ମୋହନ,
ଜଗତ-ଜୀବନ ହେ ଜନାର୍ଦ୍ଦନ ।
ଝୁରେ ମନ, କୃପା ଝରାଅ ଲେଶ,
ନିରାଶ ନ କର ନୀଳଗିରୀଶ ହେ ।
ଟାଳିଦିଅ ଦୁଃଖ ଯାଉ ହେ,
ଠାକୁର ହୋଇ କି ଠାବ ନ ଦେଉଛ,
ଠିକେ ତୁମ ଯଶ ଥାଉ ହେ ।। (୨)
ଡାକୁଛି ଆରତେ ଡେର ଶ୍ରବଣ,
ଢାଳ କୃପାମୃତ ଯାଉ କଷଣ ।
ଅନାୟତ୍ତେ ଚିତ୍ତ ରହିଛି ଟାକି,
ତାରକ ବିଶ୍ୱର ତୁମେ ଏକାକୀ ହେ ।
ଥୟ ହୋଇଥାଉ ମତି ହେ,
ଦୀନବନ୍ଧୁ ବୋଲି ଦୁଃଖ ଜଣାଇଲି,
ଦିଅ ପ୍ରଭୁ ଶୁଭ ଗତି ହେ ।। (୩)
ଧରିଅଛି ମନ ଧ୍ୟାନ ତୁମର,
ନର ନାରାୟଣ ନନ୍ଦ-କୁମର ।
ପତିତପାବନ ହେ ପଦ୍ମାପତି,
ଫିଟାଅ ଫନ୍ଦାରୁ ଫେଡ଼ ଦୁର୍ଗତି ହେ ।
ବନମାଳୀ ବାସୁଦେବ ହେ,
ଭକ୍ତଜନ-ଭୋଳା ଭାବଗ୍ରାହୀ ତୁମେ
ଭବାର୍ଣ୍ଣବ ପାରି ନେବ ହେ ।। (୪)
ମୁକୁନ୍ଦ ମାଧବ ମନ୍ଦରଧାରୀ,
ଯାମଳା-ଭଞ୍ଜନ ଯମୁନାଚାରୀ ।
ରାଧିକା-ରମଣ ରସିକରାଜ,
ଲୀଳାମୟ ଲୟ ଲାଗିଛି ଆଜ ହେ ।
ବିଷ୍ଣୁ ତୁମେ ବିଶ୍ୱବାସ ହେ,
ଶୁଣ ମୋ ଗୁହାରି ଶରଣ ତୁମରି
ଶ୍ରୀପାଦେ କରାଅ ଦାସ ହେ ।। (୫)
ଷଡ଼-ଅର୍ଦ୍ଧ ପୁରେ ତୁମେ ନାୟକ,
ସତ୍ୟ ସୁନ୍ଦର ହେ ସର୍ବବ୍ୟାପକ ।
ହରିଛ ହରିଣୀ- ହସ୍ତୀ- ଆରତ,
ହରଷ ବିତର ହୃଦେ କିଞ୍ଚିତ ହେ ।
କ୍ଷୀରସିନ୍ଧୁସୁତା-ବର ହେ,
କ୍ଷମେ ନାରାୟଣ ଭରସା ମେହେର
ଜଣାଉଛି କ୍ଷମା କର ହେ ।। (୬)
=========
(ଏହି ଗୀତଟି 'ନାରାୟଣ ଭଜନାବଳୀ' ଭକ୍ତିଗୀତ-
ସଙ୍କଳନରୁ ଗୃହୀତ)
*****
(Extracted from " Narayana-Bhajanavali" of Kavi Narayan Bharasa Meher)
*******
No comments:
Post a Comment